بسم الله الرحمن الرحيم
..
.
مدونة كونفرانسات .. مدونة مؤتمرات عام 2010م
**
*
تهنئة من القلب إلى كل الزملاء
بمناسبة فوز منتخبنا ببطولة كأس أمم أفريفيا 2010
وعقبال فرحة نتيجتنا يارب
أهال غزة المحاصرة يخرجون للشارع محتفلين بانتصار مصر
فمتى نفك حصارها ؟؟؟؟
........................
زملاءنا الكرام
أولا
>>>>>
مرت على دفعتنا هذه السنة الكثير من الأحداث التي تشاركنا في كثير منها هنا على المدونة
منها الأحداث السعيدة ومنها الحزينة
نستذكرها سريعا مع بعضنا
أحداث خاصة بالدفعة
أحداث حزينة
كان في مقدمتها : وفاة زميلتنا د رندا عماد
نسأل الله أن يرحمها ويتقبلها عنده في الصالحين ويسكنها فسيح جناته
أيضا لنا زملاء فقدوا أحباء لهم كأحد أبويهم أو أقاربهم
نسأل الله أن يتقبلهم جميعا في الصالحين ويصبر أهلهم .. اللهم آمين
بالإضافة إلى إصابة بعض الزملاء في حوادث
مثل د سماح : التي نهنئها لخروجها من المستشفى ونسأل الله تعالى أن يتم شفاءها
وزميلنا محمود أبو العزم - الذي كسر إصبعه - نسأل الله أن يتم شفاءه
بالإضافة إلى بعض الأحداث والتي قد لاتكون وصلت إلى علمنا
وأحداث سعيدة
منها زواج وخطوبة عدد من الزملاء والزميلات
نسأل الله أن يبارك للجميع وأن يتم لهم على خير ويرزقهم الذرية الصالحة
وأن يكرم بقية الزملاء ويرزقهم الزوج أو الزوجة الصالحة .. اللهم آمين
أحداث عامة
كان أهمها على الإطلاق هو العدوان الصهيوني على أهلنا في غزة الذي بدأت به سنتنا الماضية
نسأل الله أن يعينهم ويرفع عنهم الحصار
و" من لم يهتم بأمر المسلمين فليس منهم "صدق رسول الله صلى الله عليه وسلم
وآخرها ماحدث من سيول لأهلنا في سيناء وأسوان .. نسأل الله أن يكون في عونهم وأن يعوضهم خيرا
وغيرها من الأحداث
ذكرناها فقط كي نتذكر مع بعضنا كيف تشاركنا الأفراح والأتراح
وكيف كان الود بيننا
نسأل الله عز وجل أن يدوم هذا الود ولا ينقطع أبدا
.............................
ثانيا
>>>>>>>
في انتظار ظهور النتيجة - نسأل الله أن تكون سعيدة على الجميع
أمامنا قرابة شهر أجازة قبل بداية حياتنا العملية
ومما وجدناه من انطباعات الزملاء وآراءهم في الشات وجدنا أن الملل بدأ يتسرب إلى الكثير منا
لذلك
نفتح موضوع استغلال الأجازة للحوار .. ليستفيد كل منا من رأي الآخر
هناك بعض الأفكار الجميلة التي طرحت في الشات مثل حفظ القرآن والتعاون عليه
ننتظر مشروع كل زميل وزميلة لاستغلال هذا الشهر ليستفيد منها الجميع
وفي انتظار اقتراحاتكم لمشاريع جماعية لاستغلال الأجازة نتبناها هنا على المدونة
دعواتنا للجميع بقضاء أجازة سعيدة
****************************
وانتظرونا قريبا في
ملفات هامة لنا في فترة الامتياز
*****************************
أكرمنا في النتيجة ياااااااارب
هناك 12 تعليقًا:
لو سمحتو يا جماعه حد يعرف اخبار عن النتيجه هتظهر امتي عشان نستعد لها نفسياااا
elsalamo 3alaykom
ana besara7a msh shyfa ay 7aga 7elwa 7asalt fe sana satta de
el7mdo lellah 3ala kol 7al tb3n
ymkn el7aga el7elwa elwa7eda hyya eny 7asset 2d eh rbna karamny be dof3a gmela awy
E7na ekhwat bgd wallahy rbna ykrmko kolloko yarab
rbna yr7m randa yarab w yeghferlaha w ygm3na beha fe elganna yaraaaaaaaaaaaaaaaaab
mtnsosh ted3olha bellah 3leko
(HALA)
النتيجة امتي يا جمااااعه حد يعرف
حد يعرف النتيجة امتي حد يرد علياااااااااااااااااااااااا
انا نفسى اتعلم الطبخ بس باحتراف ان male by the way
هو مفيش حد عارف اخبار عن النتيجه يا خلق هوووووووو
بسم الله الرحمن الرحيم
السلام عليكم ورحمة الله وبركاته
الموضوع ده بصراحة كان محيرني
هنعمل ايه في الأمتياز
المفروض أتعلم ايه بالظبط؟؟؟؟؟؟؟؟؟؟؟
في حاجات عامة كلنا هندور عليها زي الغرز و الخياطة و الكانيولات
لكن هأتعلم ايه كدكتور؟؟؟؟؟؟؟
يعني هل كل الاستفادة الي هاستفادها هي الحاجت بتاعت التمريض؟؟؟؟؟
فين العلم الي هينفعني كطبيبة؟
في أخت من دفعة أمتياز قديمة كانت كاتبة حاجة زي مذكراتها عن الحاجات المهمة الي أتعلمتها و بصراحة حسيت بأستفادة كبيييييرة جدا جدا لما قريت الكلام الي هي كتباه
حسيت انها بتوجهني أعمل ايه و ما أعملش ايه
فقلت أنقل الحاجات الي هي كتبتها في الموضوع ده علشان أحنا و كل الي جايين بعدنا يستفيدوا ان شاء الله
تابعوني
عايزه أبدأ معاكم بشوية حاجات كده المفروض تعرفوها فى الامتياز
الأساسيات يعنى اللى مينفعش نطلع من الامتياز من غيرها
بما انى اشتغلت فترة فى الصحه وفى وحده ريفيه وشفت ايه اللى كان مفروض أعمله ومعملتوش وايه اللى أفادنى وهكذا
أبدأ بالنساء والتوليد:
القسم ده مهم جداااا فوق ما تتصوروا
شغل الوحدات ماهو الا أطفال ونساء وتوليد 90% من حالاته
مطلوب منكم فى الامتياز الحضور فى عيادات تنظيم الأسرة
لان ده شغل الوحدات
طيب اتعلم ايه هناك؟؟
1_ تركيب وازالة اللولب "هام جدا"
2- حقن منع الحمل وال intradermal implants
شوف طريقة تركيبها وامتى بنستخدم كل وسيله وايه المطلوب قبل استخدام كل وسيله
يعنى مثلا...
مهم جدا ان الست ميكونش ضغطها عالى والا مينفعش تاخد الحقنه او الحبوب حتى
ومهم جدا ميكونش وزنها زايد
وفيه حملات كتير بتحاول توعى الناس ان اللولب أفضل من كل المشاكل دى ولكن فى الريف"لا حياة لمن تنادى"
3-السونار
فيه وحدات هيكون فيها سونار وحدات لا
مهم جدا تتعلم ازاى تشوف بالسونار وبدور على ايه وامتى احول حالة للمستشفى المركزى لان الطفل فيه علامات خطر او غيره
4-متابعة الحمل
الوزن والضغط وتحليل البول والانيميا ووضع الجنين وكل الحاجات دى
لا تستهين بها اه موضوعات تافهه لكنها بتضيع حياة ناس
اتعلم كويس ازاى تقرأ تحليل البول وامتى اشخص انيميا
وفى الارياف للاسف الست من دول تيجى لك مش عارفه هى حامل ف الشهر الكام أصلا وممكن يكون فيه مشكله كبيرة وهى متعرفش
مهم جدا تعرف امتى بكتب للحامل حديد وبيتاخد ازاى
5-مهم جدا تتعلم ايه العلامات الخطيره اللى مفروض تنبهى السيده الحامل ليها لو حصلت اى حاجه منها تجرى على المستشفى
مثلا حدوث نزيف او تقولك بينزل عليا ميه او مش حاسه حركة البيبى او صداع مستمر او ترجيع وهكذا...
6-اتعلمى ازاى تعملى pv examination وازاى تشخص الالتهابات المهبليه وايه علاجها فى الانسات او السيدات
7-بالنسبه للولادات اعتقد انها مش بتتعمل فى معظم الوحدات لكن ممكن تدبس فى حالة ولاده لو كنت لوحدك وفى مكان بعيد شويه وبالتالى مفروض تحضر كام ولاده وتشوف ممكن تتصرف ازاى لو اضطريت لده
مهم جدا كمان تعرف الادويه اللى اسعارها حنينه عشان دى أهم جزئيه فى العلاج لانه لو الدوا غالى انسى ان حد هيشتريه
هذا ما خطر على ذهنى من أفكار دلوقت وان شاء الله لو لاقى الموضوع استحسان اكمل باقى الفروع باذن الله
النهارده هكتب نتعلم ايه ف شفت الباطن:D
بصوا بقى
الباطنه كبيرة وممله بجد
بس لو عرفت هتاخد منها ايه هتحس انها لطيفه بعض الشئ يعنى
أولا قراءة ال ECG
ثانيا ازاى تظبط ضغط لمريض
نبدأ بايه ونعلى ازاى وازاى أوطيه بسرعه لو كان عالى جدا ف الاستقبال وامتى أحول الحاله للمستشفى المركزى
ثالثا تظبيط السكر
مهم جداااااااا
ومهم كمان النصايح اللى هتوجهها لمريض السكر عن كيفية الاعتناء بقدمه بالذات
ولو حصلت غيبوبة اهله يتصرفوا ازاى
وايه الادوية اللى تبدأ بيها وامتى تدى انسولين
رابعا ازاى تعالج chest infection and bronchial asthma
خامسا ازاى تعالج gastroenteritis
الحاجات دى تبدو سهله لكنها محتاجه تمرين لسبب بسيط انك مش هتكتب ادويه كتير لان العيانين اغلبهم مش معاهم يجيبوا تمن التذكره اصلا
سادسا ازاى تشخص hepatic encephalopathy وتتصرف ازاى بسرعه
ف الغالب العيان بيكون عارف انه هيباتك ومش هييجى الوحده
لكن انا بتكلم عن بنات ممكن تتعين بعيد شويه ومفيش مستشفى قريبه
وكمان عشان الكبد منتشر بغباء ف مصر ربنا يعافينا واياكم
ازاى توجه عيان الكبد عموما ياكل ايه ومياكلش ايه
والارشادات للى تديها لمريض فيروس بى أو سى
ازاى تفرق فيروس A من ال gastroenteritis
ازاى تفرق cardiac asthma من bronchial asthma
ايه الادويه اللى مكن تديها لمريض الكبد "طبعا مش هتدى أدويه نهائى الا بعد استشارة طبيبه مهما كان عنده" لكن معلومه ليك يعنى اعرف الادويه ال safe
اه بالنسبه للنسا فوق اعرف الادويه اللى ممكن تتاخد اثناء الحمل والرضاعه اعتقد انى نسيت اقولها فوق
هذا ما راودنى من أفكار ف الوقت الحالى
ولو افتكرت حاجه تانيه هقولها ان شاء الله
شدوا حيلكم
وفقكم الله
أكمل لكن ان شاء الله عن الأطفال...
بصوا بقى الأطفال زى ما قلت فوق فى النسا مهمه فوق ما تتصوروا
شغل الوحدات الريفيه ومراكز تنظيم الأسره ماهو الا أطفال ونسا ومتابعة حوامل والكلام ده
مطلوب مننا نتعلم ايه فى شفت الأطفال عشان ينفعنا؟؟؟
-عايزين نتفق الأول ان الأطفال اللى هيجولنا هيكونوا من سن يوم لحد سن 18 سنه "مش عارفه ايه 18 ده اللى طفل ده بيبقى أطول منى بمراحل"
ما علينا
المهم يعنى انه كل الأعمار متاحه
بس اللى يهمنا لحد سن 13 أو 14 سنه مثلا لانه بعد كده ف الغالب بنعامله معاملة الكبار
طيب هتفرق ايه الصغيرين من الكبار يعنى؟؟
ال DOSES
لازم لازم تعرف تدى اى طفل الجرعة المناسبة من أى دوا
طيب ودى هعرفها ازاى
أولا من حضورك هتعرف كل دوا بندى منه كام لكل كيلو
طبعا هتوزن الطفل وتضرب وتعرف هنحل الدوا ده على كام سم ونديه على كام مره ف اليوم
ثانيا من كتاب النجار أو أى كتاب يشرح أدوية الأطفال بجرعاتها
انا واحده من الناس اللى عندى رأى ف الكتب دى
الكتاب ده بيحتاجه اللى ناوى يتعين اطفال أو اللى هتشتغل شغل وحدات ان شاء الله
تعامل الأطفال بأى صورة من الصور يعنى
-ازاى أشخص neonatal jaundice
واعرف اذا كانت physiological or pathological
and its level
-أكتر حالات الأطفال بتكون مغص واسهال وسخونية
أو
-كحه وسخونيه
أو
-كحه واسهال ومغص وترجيع
هنعرف طبعا كل حاجه بنكتب لها ايه
وأحسن حاجات لل upper respiratory
and lower respiratory
وكمان الاسهال ده معاه دم او مخاط ونعرف اصلا اذا كان اسهال او لا لانه ممكن الام تيجى تقول انه عمل مره واحده دى طبعا مش هنسميها اسهال لازم يكون 3 او 4 مرات على الاقل
اوعى تدى بريمبران للترجيع لانه بيعمل extrapyramidal manifestations فى الاطفال وهنكتب بدل منه cortigen B6
-ازاى نشخص حالات ال Dehydration وهل هى Plan A or B or C
وامتى أحولها وازاى الحق الطفل ده قبل ما ييجى له جفاف أصلا
-جداول تطعيمات الأطفال مش هتكون مطلوبه أوى الا للى هتستلم العمل كطبيب أول وهتكون مسئوله عن بعض حملات التوعيه والتطعيم ضد شلل الأطفال وما الى ذلك يعنى
-طبعا هفكركم ان ال Quenolones ممنوعه تمااااااما لأقل من 18 سنه فممنوع أى من مشتقاتها تتكب للأطفال
-حالات ال bronchial asthma كتيره جدا ف الاطفال لازم نعرف هنتصرف ازاى وامتى لو الطفل متحسنش يتحول للمستشفى
-لازم نفرق بين ان الطفل بيفوض بعد الرضاعه او انه بيرجع ونعلم الأمهات طريقة الرضاعه الصحيحه
-ازاى نشخص Rickets وامتى نعرف ان الطفل اتاخر ف المشى او التسنين وامتى يتكتب له كالسيوم
-حالات ال nocturnal enuresis هى صحيح مش كتير لكن لازم نفهم الأم ازاى تتعامل مع الطفل وازاى ان المشكله دى اغلبها نفسى وانها لازم تشجع البيبى وتساعده ومتسخرش منه قدام اخواته وامتى اقول الحاله دى محتاجه طبيب اطفال متخصص
-حالات ال parasitic infestation منتشره جدا ازاى نعالجها ومننساش الانيميا اللى ممكن تكون موجوده معاها وازاى نعالجها برده
هذا ما فتح الله به على من أفكار وحالات الأن ولو تذكرت شئ أكيد هضيفه ان شاء الله
وفقكم الله وأعانكم
فى حفظ الله
خلينا فى الجراحه أحسن
بصوا بقى
الجراحه لذيذه وسهله وكلها أكشن كده
واللى حاببها هتكون متعه بالنسبه ليه
المهم فى الجراحه كشغل ممارس عام بعد كده حاجات بسيطه
أولا: الخياطة
الموضوع ده هيفيدك جدا لو اشتغلت فى مستشفى بعيده شويه
لان معظم الوحدات مفيهاش أدوات خياطات والأمور دى بتكون فى المستشفيات فقط
لكن لا مانع انك تشتغل فى مستشفى ان عاجلا وان أجلا
ال simple suture
inverted
matress
وألوان الخيوط
وكل واحد بيتفك امتى
وأخيط كل واحده امتى
كل دى حاجات مهمه طبعا
ثانيا:ازاى تغير على جرح
الموضوع يبدو ليك بسيط ومش محتاج مهاره
لكن حقيقى لما بتدخل تعمل بإيدك نظرتك للأمور بتتغير
وكل مره بتكتسب مهارات جديده
وبتكون أسرع وأكثر كفاءة
ثالثا:ازاى نغير على الجرح العالمى بتاع ال Diabetic footبعد البتر أو كده
الموضوع ده غااااااااايه فى الأهميه
وعمله صح بيفرق كتير مع العيان
غير كده بقى اللى حابه يحضر عمليات ويعرف الخطوات كل دى حاجات تهم المتخصصين فقط وحضورها هيكون نوع من ال FUN فقط لا غير
لكن اللى تحب تحضر عمليات الأهم طبعا انك تحضر
Appendicectomy
Hernias
Lipoma
Biopsy
Cancers Removal With Safety Margin
Exploration
واللى مهتم بحاجه يتابعها زى الثيرويد البريست كده يعنى
هذا ما فتح الله بى على من أفكار فى الوقت الحالى
ولو افتكرت حاجه جديده أكيد مش هتأخر
دمتم فى حفظ الله
دلوقت حابة أكلمكم عن بعض الاسبشيالات
كنت حابة أتكلم شويه عن الرمد بحكم اعتزازى الشديد بيه
لكنه محتاج متخصص بيحب الماده وعايزها
وكمان محتاج أجهزة وبالتالى مش هيكون موجود الا فى مستشفى رمد
لكن فيه بعض الحاجات البسيطه زى ازاى نشخص conjunctivitis
Allergy
corneal ulcer
foreign body
طبعا الحاجات دى محتاجه تتشاف على الأجهزه أقلها ال slit lamp
لكن ممكن جدا تشك فيها وتوجه العيان صح أو على الأقل متكتبش دوا غلط يزود له الحساسيه أو يعمل له مشكله
الأهم على الاطلاق فى الاسبشيالات هى الجلدية
بييجى فيها شغل كتير وهى أصلا كلها spot diagnosis
وناس كتير بتكسل تروح المستشفى أو العيادات الخارجيه عشان المواضيع دى
هو مطلوب مبدئيا نفرق الحاجات الظاهره دى حاجه جلديه فعلا ولا حاجه تابعه ل systemic disease
ولو كانت جايه مع disease systemic
نفرق هل علاجها لوحده ولا مجرد ما نعالج المرض ال systemic هتختفى
المرض الجلدى عموما زى ما كلنا عارفين بيتشخص من مكانه وشكل ال Lesion
وطبعا مش مطلوب منك كممارس عام إنك تعرف كل الأمراض
لكن على الأقل الحاجات البسيطه ودى هتعرفها من حضورك المستمر فى عيادات الجلدية أثناء سنة الامتياز ان شاء الله
المهم جدا جدا جدا يابنات انكم تاخدوا بالكم من نقطه فى غاية الاهميه
مريض الجلديه مهما كانت الحاجه اللى عنده بسيطه بيكون متخيل ان الناس كلها قرفانه منه ومش عايزه تقرب له
أرجوكم وأستحلفكم بالله عمرك ما تحسس عيان بكده
اتعلم كويس جدا تغطى انفعالاتك أمام كل المرضى خصوصا مريض الجلديه
لان نفسيته بيكون ربنا وحده الأعلم بيها
واللى حضر فى عيادة الجلديه هيشوف الكلام ده وهيحس بقصدى بالظبط
احمى نفسك عند التعامل مع كل مريض
والبس gloves لما تلمس كل lesion
حقك انك تحمى نفسك فى كل مره
لكن حاول تفهم المريض ان ده لمصلحته هو وانك مش عايز تلوث المكان مثلا
بالله عليكم شوية رحمة فى التعامل مع المرضى فى النقطه دى بالذات
مفيش واحده فينا يرضى انه لو عنده حبايه حتى فى وشه تسيب أمة لا اله الا الله يتفرج عليها
فمابالك بمريض عنده حاجه كبيره
ياريت قبل ما نشوف أى حاجه نستاذن العيان
ونحترم رغبته لو رفض
ونعتذر له كمان
مش لانه مريض فى مستشفى حكومى او تعليمى اننا نذله
ولو كان مريض رجل اسحبى نفسك واخرجى
او استاذنيه
يابنات والله الحاجات دى بتأثر كتييييييير فى نفسيات المريض
ومحدش فينا يرضاها لنفسه
عايزه أقولكم حاولوا تحسوا المريض ده حد من أهلك
وشوف هتتصرف معاه ازاى
طبعا بعد الشر على أهالينا جميعا
لكن حط نفسك مكانه وشوف هتحافظ على شعوره ازاى
مهنتنا لا رقيب عليها الا الله
وده حمل كبير ومسئولية عظيمه
درب نفسك عليها من دلوقتى قبل ما تشيل مسئولية لوحدك فى مكان ما
كلنا بنغلط لكن الأهم اننا لا نتمادى فى هذا الخطأ
جعلنا الله واياكم ممن استخدمهم لخدمة دينه
وممن جعل لهم حظا فى تخفيف معاناة المرضى
اسفه انى تطرقت خارج الموضوع
لكن والله نفسية المريض أهم من الدواء وهى الأهم فى العلاج
وفقكم الله
إرسال تعليق